周日荷甲早場上演兩支前冠軍交手的戲碼，由阿積士迎戰川迪。由於阿積士要全力向榜首的燕豪芬施壓，而且又有報今季於荷蘭盃被擯之仇，今役一定希望大勝一仗，適逢川迪今季於聯賽亦表現低沉，因此就算阿積士讓兩球/兩球半，仍照捧上盤。（球賽編號：星期日4；now672台今日7:30pm直播）
未計今輪聯賽，阿積士與川迪這兩支前冠軍的排名可說有天淵之別，阿積士目前排第二位，落後榜首的燕豪芬七分，為保奪標希望，今迎川迪時必拚。反觀川迪則排尾三，只多包尾的鹿特丹斯巴達兩分，淪為護級份子。雖然，川迪今季曾在荷蘭盃爆冷淘汰阿積士，更令後者的教頭基沙掛冠，不過，要留意該役阿積士是作客，今役球隊有主場之利，而阿積士近四次迎川迪全勝，當中有三次淨勝超過兩球，而且，當日意外出局，只令阿積士上下更加希望可以擊敗川迪。
亨特拉爾、小古華特腳風順
人腳方面，阿積士今役有後衞馬菲迪歷特刑滿復出，一班攻擊主力如老將前鋒亨特拉爾（圖）及祖斯甸古華特等又腳風順，就算多爾貝治料續因傷缺陣，阿積士亦不難射破川迪大門。
川迪於歇冬後聯賽只得一和三負，今役亦未能「夫添」，前鋒史拉格維亞要續養傷之餘，後衞基斯頓古華斯亦要坐波監，受讓至兩球/兩球半，下盤也難看好，還是取上盤穩陣。
文：吾中