上周五意甲聯賽大戰，祖雲達斯作客費倫天拿又贏一場，2:0贏波全取三分。40歲老門將保方喺呢場波正選把關，亦係佢代表祖記第500次喺意甲上陣嘅比賽，零封對手兼贏波，別具意義。
上月28號係保方40歲嘅生日，踏入一枝花之齡佢，喺生日兩日後嘅意盃四強首回合傷癒復出，成功救出12碼幫祖記1:0小勝阿特蘭大，證明自己寶刀未老。到上周六意甲，保方又以正選披甲，表現依然穩健保住後方，費倫全場九次射門考驗唔到佢。
希古恩埋齋贏費倫2:0
祖記贏在效率高，雖然全場得39%控球率，射門三次命中就入到兩球，倒戈嘅貝拿迪斯治喺56分鐘主射罰球先開紀錄；到完場前四分鐘，祖記趁費倫空群而出，中堅基亞連尼喺後場直傳畀希古恩，呢位阿根廷鋒將單刀埋門輕鬆射入，鎖定2:0勝局。
祖記以往有唔少勝仗都幾具爭議性，今場都唔例外，費倫原本喺今仗有機會先開紀錄，上半場18分鐘因為基亞連尼被判喺禁區犯手球，球證已經判咗12碼，中場維列度已經行到埋去準備操刀，不過球證決定用視像裁判系統（VAR）再睇睇，搞幾分鐘後決定推翻原判，指費倫有球員越位在先。
有機破迪比亞路紀錄
保方喺2001年加盟祖雲達斯，轉眼近17年，終於成為球會歷史只係第二位，可以代表佢哋喺聯賽上陣500場嘅球員，呢500場有保方把關嘅比賽，祖記贏咗322場只輸61場，兼有244場保清白之身。至於上陣紀錄保持者，係昔日金童迪比亞路，513次代表祖記喺意甲亮相。祖記喺今季聯賽仲有14場波，如果保方可以健健康康踢足，就啱啱好可以打破紀錄，否則就要希望佢喺今季之後唔好退休住嘞。
呢場波除咗係保方為祖記喺聯賽上陣500場，亦係教練艾基利嘅里程碑，自從喺2014年上任之後，艾帥第200次為祖記領軍。佢喺賽後話：「我哋喺今場波表現唔錯，下半場把握到機會打破僵局。下場波係（周二）歐聯16強對熱刺，要贏肯定好難，至少要踢得好過今場波。陣中仲有四名主力傷兵，保羅戴巴拿積極爭取盡快康復，但我唔會喺佢十足好番前冒險派佢上陣。」