民主黨日前傳出因捐款減少，今年起要開源節流減開支30%，因此要削減人手，好多支持者好關心會唔會影響白鴿黨運作、地區工作同選舉工程？
八方問過一啲白鴿黨中人，佢哋話今年就應該冇乜問題，但少咗捐款，出年就真係會對日常運作有啲影響，估計捐款收入會少三成，以往年平均捐款同獎券收入有千三、千四萬計，少三成捐款收入就成400幾萬，所以都咪話唔傷！民主黨先要未雨綢繆，今年提早做節流同削減人手工夫，先減白鴿黨嘅中央開支。
另一名民主黨人話，雖然捐款減少，但係地區工作同選舉工程開支唔會減，地區工作如常，亦唔會對選舉部署改動太大，始終選舉同地區工作對黨發展好重要，所以慳中央開支都唔想影響地區工作。