【《蘋果》專訪】
【最港電影大獎】
香港的武打片是打入國際市場的通行證，亦是構成八、九十年代香港電影黃金年代的重要元素之一。行內人稱「八爺」的袁和平，曾為不少電影設計打鬥場面，令荷李活片商驚為天人，其中他有份參與的荷李活電影《22世紀殺人網絡》（The Matrix）、《標殺令》（Kill Bill）等，正是由他擔任動作指導。早前八爺在又一邨的辦公室接受本報專訪，八爺謙說：「邊有超越荷李活呀？其實我冇乜自豪感。」
拍《蛇形刁手》冇劇本
八爺師承著名武指父親袁小田，早在78年在吳思遠提攜下，執導《蛇形刁手》和《醉拳》，捧紅成龍更開創了功夫諧趣片種，八爺說：「其實係刻意咁做，我照人哋咁拍，好似咪跟尾，冇乜創新，所以咪走喜劇動作路線，冇咁多血腥，唔會話睇出嚟好殘忍，睇完會開心。」
偏好喜劇跟八爺開朗性格有關，當年在片場也經歷過不少趣事。他說：「好似拍《蛇形刁手》係冇劇本嘅，夾硬搵吳思遠寫個分場出嚟，飛紙仔啦。好彩自己揸住個分場有個概念，先知道點拍。」到後來拍《臥虎藏龍》，導演李安要求八爺設計輕功：「輕功？我鍾意拍實啲嘅嘢，我設計嘅時候都係比較實啲，唔係咁誇，有啲落腳點咁樣去，唔係一飛喺空中永遠唔落地嗰種。」為此八爺專誠向相識的師傅請教，之後再加入自己設計，最後才有竹林一幕，以及楊紫瓊決鬥章子怡的精采場面。
年輕一代怕辛苦
提到近年香港電影越來越少，動作片更是少之有少，八爺卻沒有一點感到惋惜：「我覺得市場嘅嘢興衰係有，曾幾何時武打片獨領風騷，𠵱家咁樣我覺得都係好事，證明好多人都識睇戲，要求高咗，唔一定要武打片。」反而令他慨嘆的是動作人才越來越少，因為年輕一代怕辛苦不願捱，造成青黃不接的情況。
採訪：何永寧、Sapna
攝影：陳慧安
由《蘋果動新聞》和娛樂版舉辦的「最港電影大獎」現正接受讀者投票，選出心目中的最「港」之選，包括最港電影、最港男、女演員等，截止日期為2月21日。賽果將於《蘋果動新聞》和娛樂版揭曉。
「最港電影大獎」投票網址 http://bit.ly/thekongestfilmawards