《愛情DQ掣》由去年11月開始招募單身貴族、面試到安排約會，終於煞科喇！喺呢三個月嘅拍攝過程，唔知一眾參加者有乜感受呢？
Youtuber浩嵐、有樓男Steven同文青男Daniel都齊齊話無後悔嚟玩呢個節目，相反老闆娘YoYo坦言：「絕對有後悔，鏡頭嘅壓力，加上工作，可能要安排、調配，好多嘢擔心，好玩同好驚都係有。」而主持人表妹笑笑口話唔後悔：「一開頭收到200幾份嘅份申請表，其實好開心同驚喜，但下一步就弊喇，結果打咗非常多電話，嗰時想喊！」
講到最深刻一幕，浩嵐就覺得係初次見面會玩集體遊戲，因為好多女仔揀佢一齊玩，「好似有種萬千寵愛集於一身嘅感覺！」法拉bb Sumi對踩波遊戲最深刻，「好容易會曝露咗你真正嘅性格出嚟。」泰拳Debby就話最鍾意馬天佑做形象指導嗰次拍攝，「其實馬天佑好nice，因為節目效果先有搞笑成份，現場係好好玩，無大家評論咁差。」文青男Daniel就覺得喺鏡頭面前畀人DQ係最深刻，因為係醜事...唉，你終於知道Miss思雅畀你拒絕嘅感覺喇？Daniel回應：「上次雖然難堪咗少少咁DQ佢，但係之後我哋有向朋友方向發展，佢都係一個幾好嘅朋友。」表妹都大讚思雅：「我覺得思雅係個好好嘅女仔，嗰刻我見佢轉身，咁我梗係期待Daniel都會轉身...佢唔轉喎！好似成個世界靜止咗5秒咁。」話晒真人騷吖嘛，節目組真係無預計過有咁嘅結果㗎！
拍咗咁多集，你哋又有冇事需要澄清吓？Daniel諗都唔使諗，搶住話：「呢個真係要澄清呀！我唔係真係咁猴擒，你哋快啲playback個動作！」講緊嘅係初次見面會，表妹未洗好手上嘅牌，Daniel就非常心急咁伸手想抽指示卡，同Debby玩遊戲，猴唔猴擒都係見仁見智唧！不過，確實有唔少網民覺得Sumi激似陳法拉，「見到有好多留言話我係陳法拉，但係我要嚴正聲明我唔係陳法拉！」
澄清過後，仲有乜想講先？Steven覺得，「參加呢個節目可以擴闊圈子係開心嘅」。YoYo不約而同話：「好感恩呢個節目識到Steven。」Daniel亦有反思，「喺節目認識多咗自己，知道自己鍾意開朗、有幽默感嘅女仔，相處會舒服啲，慶幸當初有上嚟！」
雖然幾對男女最後會唔會發展成為情侶，仍然係未知之數，不過表妹笑言：「成個節目最成功就係撮合咗導演同埋浩嵐！」皆因導演係初次見面會獻出咗銀幕初吻畀浩嵐！可惜導演即刻大派檸檬：「唉，我有女朋友喇浩嵐，你死咗條心啦！」食檸檬唔緊要，最緊要係心存昐望，當你以為身邊個個筍盤已被封盤，可能最好的尚未來臨！參加者們，唔好忘記成功脫單要同大家公佈好消息！加油！
主持：何宛珊 (表妹)
撰稿：仙
攝影：馮燊明、梁依能、動L
後期：馮燊明
視覺設計：Cammie
編審：仙
編導：馮燊明
監製：仙
最港電影大獎投票網址
http://bit.ly/thekongestfilmawards
精選娛聞，喺晒《娛果》
http://fb.com/appledailyent