特區政府每年都會喺禮賓府搞新春酒會，今年特首林鄭月娥就定咗2月28日喺禮賓府搞，民主黨林卓廷就喺fb貼文，話嗰日係星期三，立法會要開會，娥特揀嗰日開新春酒會，立會議員點去到？不過個po好快就唔見咗，八方就梗係覺得奇怪，於是走去問阿廷點解要刪po呢？
阿廷話記得嗰日要開立法會，但就冇為意當日係財政司長陳茂波宣讀預算案，通常半日就完會，議員應該去到政府新春酒會，所以就立即刪咗個po，兼且要向娥特耍冧！不過有政圈好事之徒話，議員係去到新春酒會，不過按慣例波叔當晚要去電視台出席預算案論壇，即係唔使預佢會到場喇！