營銷A一年辛苦到尾，畀老闆捽數捽到暈，去年十二月中卒之交到數，而仲超標兩成㖭，於是預備農曆年去北海道二世古同老公及愛兒滑雪，屆時正值中國人旅行旺季，兩岸三地中國人皆崇拜日本，有長假期仲唔去日本鬥迫鬥血拼咩，營銷A話好辛苦先至搵到熟人幫忙，訂到酒店，佢有家長群組訴苦：「連名古屋酒店都全部爆晒，訂唔到房呀！」訂唔到房，可唔可以指控日本人故意為難中國人，要群起唱「起來、起來」呀，我地係要去日本旅遊呀，用錢去征服日本人嘅面子呀！
呢日營銷A搵埋專業旅遊專家一齊到香港老飯店食午飯，大談旅遊經，順便向專家R問吓旅遊貼士，專家R以前去慣日本，現在步入中年，變成崇歐派，極力主張大家去玩，就要搵足夠假期到歐洲遊船河，尤其是River Cruise，名副其實係「遊河」，例如坐船到波爾多釀酒區，優哉游哉，唔知幾嘆，但起碼要有兩個星期時間，擒擒青就無乜意思喎。
營銷A話農曆年假期之後，最遲3月1日就要投入工作，全力搏殺，邊度會搵到兩星期假期去歐洲吖。睇佢身穿Moncler羽絨，用飛甩雞毛手袋，就知佢年年都要為quota搏殺，先至夠錢使，又真係幾難走去歐洲兩個星期喎。營銷A問專家R：「喺香港上船參加四五日沖繩遊，好唔好玩？」專家R大笑：「你鍾意，或者慣咗在旺角行街，人迫人，咪參加呢類海上遊囉。呢類遊覽最多本地人及內地人參加，通常夠晒熱鬧、甚至嘈吵，吃自助餐又似四出搶食，或者啱晒你嘅進取性格。」專家R又話參加海上遊嘅大忌係到上海市上船，包保全程冇啖好食。佢試過一次因業務理由在上海上船，有三千名內地客，自助餐餐廳由朝到晚坐滿祖國同胞，一日吃個不停，專家R幾位香港客勢孤力弱，幾乎淪落到成為饑民，佢向輪船公司投訴，公司代表同佢講：「R先生，大家咁熟，唔好嘈啦，中國人係我地最新米飯班主呀，下次請番你到萊茵河坐船，包保冇你同胞在船上！」有此經驗，專家R話坐郵船最好飛去歐洲港口上船，香港上船無論去東去西都缺乏景點，在上海上船係自尋苦吃。最他條，最舒服寫意就係夏季假期遊多瑙河、萊茵河，𠵱家就要籌劃嘞！