十年前陳冠希拎咗一部手提電腦去整，結果改寫了很多人的命運。「奇拿」已漸為人淡忘。但昨日又有人提起——不過並非上述兩人，而是另一人——eLiTe Multimedia Limited職員謝某。當日謝將電腦內嘅硬碟backup，儲存喺外置hard disk上，發現部分「閃卡」，即與份屬同事嘅史某一齊欣賞。由於牽連甚廣，謝便即時吩咐史「當冇睇過」，史當時表示明白，但原來已將「閃卡」偷偷燒咗落碟，仲俾人睇。其後網上開始流出「閃卡」。
事過境遷，鍾欣潼（阿嬌）都宣佈將閃嫁「醫界王陽明」賴弘國，離奇地微博上卻有一名同樣姓謝，與案中謝某同名同姓的網民，留言向阿嬌致歉。
呢位謝生喺微博寫道：「九年了，你終於結婚。對不起你了。」但到依家仍未能證實該網民係咪真係謝生本人。有網民留言話「他」不該再提舊事：「你應該親口對她說。」
講番史生，佢喺09年5月就三項不誠實使用電腦罪被判入獄8個月零15日。史曾接受周刊訪問，稱自己係代罪羔羊：「警察拉唔到奇拿咪拉我囉！」同年陳冠希接受CNN訪問，當時可以話係佢為重返娛圈試水溫之作。被問到點睇史生？陳冠希坦言當初都有恨佢：「依家心態同8個月前已經唔同了，我已經原諒咗佢，而佢亦要坐監。」