吾友茜利妹可以作證，早在去年一月，我已向她預測一七年最具代表性的字是「七」。果然，特首選出777；港人港事，亦果然柒吓柒吓。
來到二零一八狗年，不用扶乩問卜，我敢斷言，乃是個「鼎」字。除了鼎爺李家鼎繼續展示廚藝、周浩鼎繼續展示笑料之外，重中之重，當然是人大一言的那隻九鼎，主旋律者也，有排唱對台戲，勢必頂完又頂。
真心，我愈來愈喜歡中文的一音多字和南北大不同，任由釋法演繹。一句頂一百句，究竟係大人物一句話勝過一百句，抑或講一句俾人窒一百句？化鼎為頂，更加萬能key。在內地網上討論區，頂，含有置頂、支持的意思，為求不讓post下沉（多無聊的面子問題），樓主們會自己造馬寫個頂字，原本的post即刻鹹魚翻生登上榜首；作為粉絲或盲目五毛，亦習慣有理冇理跟帖寫番個頂字交番個朋友，何其廉價又何其中國特色的投票制度！諗深一層，正反聲音難得如此一致，當大家異口同聲仰天長嘯：「頂……」的時候，被北大人誤解為我輩十卜擁護一言九鼎，都唔錯吖，那就無懼以言入罪了。正如之前街頭示威，內地傳媒報導成港人爭先上街慶祝回歸呢，足見蓄意誤解，有助和諧。
一字記之曰頂，潛台詞是「頂唔順」抑或「頂硬上」？也各自表述。有路數移民才有資格頂唔順；留下來的，唯靠頂硬上。
嗱，唔爭在批埋一九豬年──茶樓點心，你以為頂點已經夠揦脷？高處未算高尚有超點喎，所以預測最具代表性會是「超」字。每況愈下，爆得出個頂字，至少包含頂撞、頑抗，但嘴藐藐超超聲，便僅餘無奈與不屑。好在，它照樣能語言偽術：「我學同胞網民講『超讚』的『超』箒。」
Trust me，吟得甩的，到時冇咩人仲會覺得「超」係粗口，因為到時，粵語文化怕且都被趕絕得七七八八。