下星期就係大家期待已久嘅農曆新年，相信唔少人都非常期待拜年、𢭃利是、放年假，不過一眾參加立法會3.11補選嘅候選人似乎新年流流都仍然要為選舉奔波，新年前就要落年宵拉票，初一初二都要出席活動，佢哋都不約而同話多謝家人體諒，亦相信努力會為選情帶來新氣象。
區諾軒踩通頂 陳家珮求收爐
港島區民主派候選人、前民主黨成員區諾軒年宵會暫時回歸民主黨，幫手開檔揮毫寫揮春，仲即場做節目同市民拜早年，預計年三十晚都要搞到凌晨兩三點先可以休市。不過佢之後就會休息兩三日，初四先啟市拉票，畀團隊同自己都有時間陪吓家人。
至於新民黨陳家珮透露，有義工反映新年希望唔好收爐，但被陳家珮一口拒絕，「我返轉頭要求佢哋收爐呀」。佢覺得補選雖然重要，但享受家庭樂更加重要，佢初一初二就會上門去義工屋企拜年，慰勞吓義工團隊。
姚松炎無休 杏兒姐夫篤魚蛋
九西方面，八方有問民主派候選人姚松炎扮完蛙男仲有乜搞作，佢話初一至初三唔會收爐，蛙男會繼續做社區活動，準備重返議會之旅。
另一候選人民建聯鄭泳舜（胡杏兒姐夫）新年亦冇得休市，初一就要落深水埗視察楓樹街新春美食墟市，唔知會唔會咁勇武拮番串魚蛋呢？佢今年為咗迎戰補選，更加整咗「新年新希望」fb特效框，希望支持者換上fb頭像集氣喎。
范國威還畫債 Bill唔派利是
新界東方面，新同盟范國威同樣係冇爐收，佢話由今日到年三十晚都會落唔同年宵拉票，初二起就會有公開活動。即使初一冇活動，仍然要留喺屋企畫畫還債，事關佢今年為籌款參選，決定為狗主繪畫愛犬水墨畫，所以要趁新春埋頭苦幹還畫債喇。
另一候選人民建聯、工聯會鄧家彪就話選情緊張，今個新年決定唔收爐，初一初二都會安排拉票活動，初二好大機會去沙田車公廟出席車公誕，為自己求支好籤，再同鄉親父老拜年。佢話家人都好體諒佢新年要出席公開活動，不過今年有個特別大難題，就係因為選舉條例所限，唔可以派利是，即使想慰勞吓樓下看更都唔得，「哎呀，派就犯規，唔派又尷尬」。
李八方