維園年宵今日開始，同往年一樣，支聯會今年繼續喺近港鐵天后站興發街入口嘅年宵1號同2號攤位開檔，今年年宵攤位佈置成迷你「六四紀念館」，仲以介紹「民主女神」故事為主題，咁自然唔少得用「民主女神」做主題嘅年宵物品。之前八方都寫過，今年支聯會年宵主打民主女神，今次終於有實物睇。
呢套迷你民主女神像一套三款，包括crossover網上流行截圖嘅「女神問號」卡片座、「民主正呀喂」橡筋托同「火炬」手機電線座。同場仲有《同時代人：劉曉波紀念詩集》、「六四」記憶棒，以及支聯會最新製作嘅劉曉波遺孀劉霞詩句布袋同水杯、民運歌曲專輯、書刊同T恤，現場仲有尊子同馬龍為市民畫肖像，為重置「六四紀念館」籌募經費。