美國總統特朗普嘅稅改方案已全面實行，將企業利得稅由35%下調至20%，但呢個政策令好多大企業出現虧蝕，而英超豪門曼聯亦都身受其害。紅魔鬼單單喺2017年下半年就錄得2,900萬鎊（約3.2億港元）嘅虧蝕，而呢個數目亦創咗近八年半以嚟嘅新高，但財政總監巴迪（Cliff Baty）強調球隊嘅財政仍然健康。
全英超最高薪酬支出
眾所周知曼聯係全英超最高薪酬支出嘅球隊，陣中嘅阿歷斯山齊士（山神）、盧卡古同埋保羅普巴等個個都係高薪一族，而山神嘅周薪更係全英超最高，達到45萬鎊（約480萬港元）。曼聯周四公佈財政數據，顯示該隊上年下半年出現2,900萬鎊嘅虧蝕，而呢個數字係自2010年以嚟最高，事關紅魔喺該年嘅第三季度錄得高達6,580萬鎊（約7.1億港元）虧蝕。
而喺前年同期，紅魔一共錄得1,870萬鎊（約2.1億港元）嘅盈利，而巴迪就歸咎特朗普嘅稅改。巴迪話呢個政策長遠嚟講係好事：「我想重申嘅就係，呢個只係非現金會計支出，而呢啲唔會影響球會的財政競爭力。」由於紅魔嘅班主係美國商人格拉沙，所以稅改對球隊嘅收支有頗大影響。
山神關注度勁過尼馬
另紅魔上年第四季度嘅營運利潤為2,870萬鎊（約3.1億港元），但比前年同期減少咗23%。但紅魔CEO活華特就驚都未驚過，佢形容球隊擁有堅實嘅商業模式，容許佢哋去投資球會嘅未來，包括同領隊摩連奴續約同埋以高薪由阿仙奴撬走山神。
睇返一啲好消息，自從山神喺一月轉投紅魔之後，好多魔粉搶購佢件波衫，而銷量仲破咗紀錄！活華特話：「山齊士創下咗球會一月新兵球衣銷量嘅新高，足足係舊紀錄嘅三倍！」
另外山神轉會新聞亦喺社交媒體瘋狂被轉發，關注程度仲高過尼馬季初由巴塞隆拿轉投巴黎聖日耳門（PSG）嘅消息。活華特又話：「呢個係為曼聯歷來喺ig吸引到最多like，同埋最多人留言嘅帖文，足足有200萬個留言同埋點讚，而fb同twitter嘅轉發數量亦係有史以嚟咁多。山齊士轉會得到嘅關注，亦比尼馬多出75%。」