英超韋斯咸宣佈，成功簽下36歲自由身嘅曼聯前隊長艾拉，佢將會披上槌仔幫嘅27號球衣，合約將去到本季季尾結束。艾拉上年11月效力法甲馬賽時，喺一場歐霸盃賽前受到球迷挑釁，出腳踢向對方，之後俾馬賽解約回復自由身，兼俾歐洲足協判罰歐洲賽停賽七個月，但本土聯賽就未受停賽令限制，所以無礙佢幫韋斯咸上陣。