近年電子支付系統發展迅速，八達通App「好易畀」仲殺入街市，馬鞍山嘅街坊喺恆安街市只要用手機掃攤檔QR Code，就可以買餸，連散銀都唔使袋。
恆安街市翻新後上周三重開，成為首個同時接受八達通App同卡畀錢嘅街市，超過八成檔戶可用QR Code畀錢，六成安裝八達通拍卡機，街市嘅顧客服務檯仲可以增值八達通。八達通行政總裁張耀堂話，用八達通App交易首年唔收檔販費用，之後就同用八達通卡一樣，會收番1.5%交易服務費。
生果檔主陳先生話，每日平均有7至10人會用App畀錢，當中較多係後生師奶。用八達通App畀錢買生果嘅吳先生就話，覺得用手機畀錢比想像中快，自己都唔鍾意袋散銀，會繼續用App買餸。