Shopping行到有啲攰，走出戶外睇睇綠色植物休息吓，肯定即時醒神番。新擴建嘅青衣城二期特設5,000平方米嘅戶外平台同天台花園，為市民提供綠化休憩空間，相信會成為唔少青衣友嘅流連地。
其實呢個係港鐵公司首個自行發展嘅商場，樓高4層有35間新商舖，噚日特別舉行開幕禮，除咗港鐵行政總裁梁國權出席，亦特別請咗葵青區議會主席羅競成同葵青區議員譚惠珍等地膽見證。
梁國權致辭時當然賣花讚花香，指青衣城商場同港鐵青衣站無縫連接，係港鐵獨特嘅「鐵路加物業」綜合發展模式成功典範，希望呢次擴建為社區注入新活力。