工聯會立法會議員麥美娟噚日喺特首質詢環節中，指娥特喺施政報告話過會檢討產假安排，查詢政府呢個檢討幾時開始？會唔會令婦女生育時唔使俾人扣人工？現時仍然係單身嘅佢，唔通情人節前夕，特別感懷身世？其間大嘆：「雖然呢個假期，我應該有生之年都唔會有機會享受到……」
娥特回應就話，自己作為首位女特首，知道女性對佢有期望、希望佢積極去睇女性員工關心嘅議題，但佢同時補充，雖然勞福局長羅致光係男人，但都好關心女性權益，「加上工聯會前議員陳婉嫻擔任埋婦女事務委員會主席，都彰顯咗本屆政府推動女性權益嘅決心啦！」
娥特話政府正研究產假嘅薪金、日數同周數問題，若有結果會盡快同立法會交代，但現時唔能夠承諾任何檢討結果喎。