已守齋大半個月的練馬師姚本輝，上星期去過新西蘭買馬，轉個圈返嚟連運都轉埋。這晚（7日）姚本輝第三場由潘明輝贏「包裝騎士」後，第四場立即憑「指揮官」再下一城，包辦孖寶。
今晚谷中第四場四班1200米，姚本輝旗下、由李寶利執韁的大熱門「指揮官」順利勝出，此駒季內大熟，連同今晚一連五場錄得兩冠兩亞一殿，今次單Win及組合獨贏A1分別派34.5及24.5元。
「指揮官」今場贏得非常輕鬆，沿途守第四位，直路一騎即彈上，小勝頸位，鞍上人李寶利連同剛周日（4日）以告東尼馬房「帝聖寶貝」攻下沙田頭場，累積連勝兩個賽日大打反擊。呢位意大利籍騎師季內已贏19場頭馬，進佔騎師榜第六位。
姚本輝表示細粒馬「指揮官」來香港初期身形很單薄，唔食得，因此唔襟做功夫，要先養番壯，近期馬兒食慾好轉，可以操練積極，遂交出頭馬。姚本輝又話「指揮官」現時大熟大勇，仍在進步中，快活谷及沙田均為合適。
第四場賽事開出熱頭冷腳，第二名「劍凌雲」係第三熱門，連贏搭頭馬「指揮官」開出全場最熱一瓣，派彩只得78.5元；三、四名則順序由一對冷馬「爪皇轟天」及「全勝姿態」依次瓜分，四重彩派一萬三千幾。