呂健威馬房上個月曾連勝四次賽事，直到剛周日（4日）至斷纜食白果。事隔短短三日，呂廐今晚（7日）谷中馬上重新贏馬，於頭場五班一哩勝出熱門「順其自然」，該駒由騎師羅理雅打開季內勝門，單Win及組合獨贏A2分別派57及30.5元。
五歲澳洲自購新馬「順其自然」與外號綠魔的「有得威」同父，成就雖大有分別，但上季贏四班谷草1200米開齋，呢次跑五班賽始終有利。
本來「順其自然」於去年尾12月13日已跑五班谷草一哩，但因發熱及食慾不振退出，今次病癒復出，首度由羅理雅策騎出賽，沿途留前鬥後守七八位，直路克服132磅障礙，衝得甚勁，險勝短馬頭位。
呂健威近期專攻頭場，2018年已憑「好彩波幅」、「執子之手」、「金錢炮」及「順其自然」4次勝出頭場賽事。
頭場跑出熱頭冷腳，大熱門「滿載而來」贏完泥地轉谷中，最終影相不敵「順其自然」做阿二，連捷落空，三、四名則由一對冷馬「金禧足球」及「威震天」依次瓜分，四重彩派12萬幾。