大埔太和農墟嘅白梅樹，寒冬越凍，開得越盛，唔少市民無懼淒冷趁墟賞花，農墟喺非營業時間都特別大開方便之門，畀市民獵影白梅花姿同相思鳥花間美態。
太和農墟有好幾株白梅樹，但非營業時間農墟會關閉，慕名賞梅市民不得其門而入，就只能觀賞枝椏延伸出行人道嘅白梅。有網民近日將拍得相思鳥花間靚相同放上網大家share，吸引更多慕名到訪嘅市民，由於近日梅花盛開，農墟仲特別開閘畀市民入內觀梅取景。
黃先生家住大埔區，今年係第4次到農墟影梅花，最愛拍白梅花襯托暗淡枝椏，倍添白梅高潔優美。佢話近日梅花開得燦爛，每次都見到逾百名攝友同市民獵影。行山領隊羅先生帶隊行山後就到農墟觀賞梅花雀影，佢話近日農墟白梅喺網上爆紅，特別同隊友到白梅花下合照留影。