肥仔K在「信報」寫專欄有年，「信報」從專欄稿件，挑選精華，結集成書，於1月21日在荃灣中華書局舉行新書發佈會，到場者有三四十人，左丁山在跑馬日當然人在馬場，冇去到，後來聽番肥仔K講，除咗幾位曾肇添中學同學捧場之外，聽眾中有一位「日經」嘅年青記者，但最令佢意外，覺得受寵若驚嘅，就係佢阿姨嘅老師小思赫然在座，論輩份，小思係肥仔K嘅祖師婆，唔怪得佢要捧住小BB與太太向小思鞠躬，一齊合照也。
肥仔K本新書叫做「笑看東瀛」，內容當然係講日本，由文化社會現象講到日本歷史與日本遊風情。呢類書賣唔賣得呢？好難講，現今書籍市道低迷，人人睇手機上網，文字印刷本難與匹敵，不過有心人或者會讀吓，另有體會，好似科大校長陳繁昌為此書寫序（英文），就講到：「I enjoy his breezy and fact-based writing style. I highly recommend his book to readers who are not only interested in Japan but also in knowing Hong Kong a little bit better in comparison.」
肥仔K叫左丁山多送幾本書畀啲uncle, auntie請各人指正。呢日左丁山想起去買牛角包，於是拎一本去A La Bakery，預備送畀蔡和平。果然見到羅拔坐在店內與拍檔開會。羅拔話：「啱嘞，我有一本新書送畀你。」咁啱嘅，於是一書換一書，佢本書叫做ROBERT CHUA, TV50 Golden Years, The Hongkong Story，本書有圖片，有字，有前遠東經濟評論漫畫家Morgan Chua嘅插圖，內容有不少電視紅星的故事，例如汪明荃、沈殿霞、杜平、李小龍、鄧麗君等等，但每篇都好短，左丁山一望，只輕輕講一句：「精簡得滯噃！」點知羅拔哈哈大笑：「你要用手機影埋每一頁嘅QR Code，即時上網。」於是教左丁山用iPhone8一影，即刻聯接到網頁，內有汪明荃更多圖片與video資料，包括汪阿姐自述，好似睇電視訪問咁。羅拔請製作人Peter（黃子榮）解釋，呢本新書配合新科技，將文字、影片、圖片連結到網頁，一影QR Code就可以上網睇多啲，呢個方法與構思係羅拔諗出嚟嘅，已在新加坡申請專利，以後買一本書就係睇精華，書內QR Code藏有大量數據資料，隨時更新，包唔會落後滯後，如果經濟學家出書，就可以隨時更新書內嘅統計圖表，唔使再推出新版。左丁山揭完呢本QRB（Quick Response Book），真係服晒，蔡和平呢種出版新書方法，可能會顛覆書籍出版業。