50歲嘅「海灘波神」彭美拉安德遜（Pamela Anderson）最近自爆踏入更年期，開始出現潮熱、疲勞及情緒不穩等症狀，好彩上年識咗細18年嘅32歲法國足球員男友Adil Rami，陪喺佢身邊，幫佢度過更年期不適，仲話：「佢嘅英文唔太流利，我嘅法文都唔好，但我哋有肢體語言。」
二人去年5月於F1摩納哥大賽（Monaco Grand Prix）認識，拍拖8個月，佢仲為細自己18年嘅男友搬到法國馬賽定居。佢指兩個仔都長大成人，自己獨居加上更年期非常寂寞，但自從識咗男朋友之後一切都好好多。講到呢段母子戀，佢話：「我哋想保護戀情，太多虛假做作嘅感情只係想得到外界關注。佢唔想，我都唔想，我哋唔係為咗搏見報先拍拖。」不過佢都知道年紀相差太大難以持久，所以已心理準備隨時會散咁話。