【愛情DQ掣(18)】感情危機!神秘軍師撐有樓男 出招追老闆娘

【愛情DQ掣(18)】
感情危機!神秘軍師撐有樓男 出招追老闆娘

《愛情DQ掣》為最後一對參加者,化妝店老闆娘YoYo同有樓男Steven,安排第二次約會,去到獲米芝蓮推介嘅意大利餐廳CIAK - All Day Italian食晚飯。

第一次約會,YoYo喺決擇時刻想轉身,又唔想轉身咁,睇嚟Steven喺呢段關係都危危地。於是,製作組搵嚟看透愛情世事嘅葉念琛導演,對Steven指點指點!專拍愛情戲嘅葉念琛,今個月有賀歲愛情片《我的情敵女婿》上映,佢話戲中都有場飯局,兇險過YoYo同Steven好多,今餐?小兒科啦!

Steven上次同YoYo First Date有啲危危地,Steven今次要發力喇。

製作組特登請葉念琛導演嚟幫Steven一把。

葉念琛話帶女仔去餐廳,咪對住個餐牌揸唔定主意,對方容易誤會你緊張價錢。

同葉念琛導演首次見面,Steven提出嘅第一個問題就係「話題」!30歲嘅Steven覺得同23歲嘅YoYo有年齡差距,成日擔心大家無嘢傾。葉念琛就認為食一餐飯,最簡單就係傾食乜嘢,從而知道對方飲食喜好,以後記住,女方就會覺得男方細心。

葉念琛即時畀個挑戰Steven,要當佢係YoYo咁一齊嗌嘢食,Steven一路望住個餐牌揸唔到主意,葉念琛就提醒,「你睇咁耐,女仔會以為你好擔心價錢,你應該好豪氣咁睇兩吓,就即刻嗌嘢食,咁先會覺得你視錢財如糞土吖嘛!」葉念琛又教Steven,話食西餐最緊要留肚食甜品,呢方面女方話食咩,男方都要話「想食!」

睇兩位食飯時有傾有講,冇咩特別咁。

其實葉念琛就坐喺遠處,用耳機同Steven溝通!

葉念琛為咗增強Steven嘅鬥心,提出同佢打賭,佢哋各自揀一道前菜,賭吓YoYo會鍾意邊個嘅選擇,究竟邊個更加捉摸到女仔嘅心意呢?另外,葉念琛會全程秘密做Steven嘅幕後軍師,透過藍芽耳機提點Steven。製作組就同YoYo解釋耳機係用嚟同工作人員溝通,唔知瞞唔瞞得住YoYo呢?即刻去片!

場地提供:CIAK - All Day Italian

主持、撰稿:何宛珊 (表妹)
攝影:馮燊明、梁依能、動L
後期:馮燊明
視覺設計:Cammie
編審:仙
編導:馮燊明
監製:仙

最港電影大獎投票網址
http://bit.ly/thekongestfilmawards

精選娛聞,喺晒《娛果》
http://fb.com/appledailyent