今個星期五（9日）開始，係一年一度馬術大師賽香港站舉行日子，更有亞洲區唯一嘅馬會騎師馬術接力賽上演，今晚（7日）谷草賽事前，馬會高層聯同一眾馬術接力賽參加者，率先會見馬迷。
呢項賽事係由本地四位平地賽騎師，聯同另外四位馬術本地及外籍好手，每兩人一隊，組成四隊。何澤堯夥拍本地年僅21歲馬術新星黎嘉怡構成「飛猛隊」，梁家俊則與馬術公主賴楨敏成為「傳承隊」。
郭能與法籍16年馬術世界第一的德雷斯特組成「馬會隊」；雷神莫雷拉與以17歲之齡成為奧運會，歷來最年輕的場地障礙賽騎手凱斯勒組成「四季隊」，而露出一雙長腿今年23歲嘅凱斯勒係富家女，來自煙草商家庭，今晚喺記者會中不時拎電話出嚟selfie，相當好奇快活谷賽日嘅運作。
今次騎師馬術接力賽同上年方式一樣，馬會平地賽騎師和騎手會以接力形式跨越欄，並以最快時間完成賽事，擊敗其他隊伍。上年冠軍隊伍為莫雷拉和法國騎手Roger Yves Bost的「雷霆隊」大熱勝出，而雷神已是連續兩年贏出，睇吓今年有冇機會同呢位美籍靚女騎手凱斯勒，取得三連霸。