娥特一聲令下要跟進，民政局長劉江華即刻約商會傾油麻地果欄活化。原來欄王同欄商喺周二見面，欄商似乎被冧掂，九龍果菜同業商會會後出聲明話撐活化保育。
商會喺聲明中指會配合政府、區議會一齊做好活化，共建可以推動本地經濟、吸引遊客嘅新油麻地地標。當然啦，商會都想政府喺唔影響公眾嘅前提下，幫助受前年果欄大火影響嘅災民進行臨時營運，即係唔影響生計乜都可以傾。地政總署更已經喺欄內發出通告，話當局即將收回果欄，職員會就戶口進行凍結登記。
果欄問題講咗咁耐，連審計署都就搬置問題批評過3次，家陣終於有聲氣，劉華總算交到少少功課。民政局話，好高興業界同持份者支持活化，當局會成立以當區民政事務專員、區議會為核心嘅聯絡小組同商會傾活化。個頭開得似乎唔錯，之後點發展先真正考驗欄王嘅功力。