【add專訪】25歲香港「美人魚」歐鎧淳，靚女、真性情，加上泳壇表現出色。早由鎧淳BB升格做女神，半隻腳叉入娛樂圈，前日還入圍今屆香港電影金像獎角逐最佳新演員獎，感情方面有同樣是由運動員變演員的男友胡子彤。由2008年開始為人所識，今年剛好十年過去，歐鎧淳坦言游水在此刻仍是放第一位，但未來不會多諗，只想活在當下，「我好少好少想回望，只想做好現在嘅事。」
採訪：林妙萍
攝影：郭賢興
化妝：Onki Lauau
髮型：Stone Cheng of Queen's Private I Salon
首飾提供：Swarovski
服裝提供：Au Jour Le Jour （Harvey Nichols）、N12H
歐鎧淳這天在中環出席Swarovski活動、受訪影相，事前必須先報告教練，等批准，請假，星級運動員一樣要跟足規矩，「唔能夠做太多event，我哋呢類水平嘅運動員，休息其實好重要。不過教練好開通、好開明，知我哋運動員唔可以做一世，所以會畀我哋去把握其他機會。」平日一日游四小時水，一至六從不間斷，進入亞運備戰期，操練強度再推大。
京奧開竅
自小習泳，歐鎧淳正式為人所知則是2008年京奧，當時16歲美少女的她，代表港隊出賽。十年過去，得過不少獎牌，里約奧運當上港隊持旗手，被內地網民封為「標準的東方維納斯」。今年8月再戰亞運，「我一直覺得08年係個好大突破嘅一年，由9歲開始游水，到咗15、16歲先真係好似醒咗，自己有個好大嘅推動力突然萌生。」其中一個觸發點，絕對是她多年來都掛在口邊的一幕，見證水怪費斯（Michael Phelps）奪八金，「好神奇！乜嘢人可以做到呢？」興奮依然，「我有機會坐喺池邊望住佢游，好近距離，大約20至30米之內，再望住佢上頒獎台拎獎。2008年我幾歲？只係15、16歲，當時會諗，如果我再繼續努力、繼續努力，可唔可以好似佢咁，企上金牌個位？嗰時有一下忽發奇想，亦真係推動得我好遠。」
背泳突破
至於當初定下的夢想，今天又達到多少？女神感觸眼眶微紅，「我係個好活在當下，要點樣做好𠵱家自己一樣嘢嘅人，我好少好少想回望，只想做好現在嘅事。十年前，冇諗過十年後，更加冇諗過到𠵱家都仲係做緊運動員，仲做咗四年全職。好得意，每一次想完，想唔游、想退役，總有一啲事發生、一啲人令我想繼續再試吓，出嚟又真係有幾好成績，就係咁，一路路引領我向前行。」今年依然努力亞運，活在當下，就是做好當下，「想喺亞運拎一個獎牌，接力好大機會坐季望亞，個人項目想有好成績，想100米背泳突破一下。」
歐鎧淳客串過《春嬌救志明》，更憑此片入圍今屆香港電影金像獎最佳新演員獎，「驚喜，完全冇諗過。喺訓練以外咁小時間參與拍攝，都可以畀大家注意到，係好幸運嘅事，多謝大家。但其實我覺得自己唔值呢個提名。」對於未來？「我想推動青少年運動發展，因為始終喺呢個圈子打滾咗咁耐，都熟悉一啲人和事，喺運動界得到好多，應該回饋返呢個圈子。」
講胡子彤
歐鎧淳和《點五步》演員胡子彤拍拖，這一對運動情侶，都在運動與幕前中找平衡，「我哋都係運動員，踩咗半隻腳入娛樂圈，有好多共同話題，佢又好明白我嘅一啲煩惱同埋一啲諗唔通嘅嘢。我係游水行先，做嘢第二，呢樣好清晰。」
至於下周情人節怎慶祝？歐鎧淳O嘴：「幾時係？哎呀，我呢個女朋友係好唔盡責，乜都未諗呀。」上年男友和她燭光晚餐，「乜都唔使送，我哋講心。」
Skin Care黃金時間
鎧淳BB的確有着BB肌的白滑肌膚，長期浸水，她自有一套又快又簡單的護膚心得，「我哋成日素顏見人，做完運動後，其實有一段我叫『黃金時間』嘅時間，就係沖完涼，皮膚仲係好熱、好多水份時，即刻做好多skin care步驟，搽serum、cream都會好吸收！」直認非常貪靚，歐鎧淳最愛簡單有型的打扮，亦會加上閃亮的水晶耳環作配襯，「𠵱家會整指甲，覺得好靚又方便。」
更多精采時尚內容，盡在 http://add.appledaily.com。