維園年宵10號就開市，今年嘅新年似乎特別凍，除咗打邊爐，行年宵熱熱鬧就啱晒。公民黨黨魁楊岳橋日前喺IG po相，化身公民黨年宵攤檔代言人，大玩其中一款「對準正拳」嘅產品，寓意用拳頭打走威權。另外一款就係適合成班老友玩嘅「吹吉避凶」，寓意要催起好運、催谷3.11立法會補選嘅民主派選票。
除咗出品政治味濃玩具，AY亦將自己嘅墨寶crossover特首林鄭嘅金句，將「我老公話我黐線㗎」同「瞇埋眼咪睇唔到囉」變成膠紙，相信唔少夫婦都可以將兩句金句互貼對方。
話時話，大家可以留意番，據聞3位代表民主派嘅補選候選人都會現身公民黨同民主黨嘅年宵攤檔，直接向市民拉票力谷3.11補選。