海洋公園計劃興建3間酒店，頭炮海洋公園萬豪酒店預計今年6月13日開幕，但萬豪酒店總經理孔憲榮話酒店仲等緊入伙紙、酒店牌照等文件，確實日子有待落實：「但有信心日子唔會差太遠。」
平均房價2,000元
新酒店接連港鐵站，平均房價約2,000幾蚊，孔憲榮話酒店定位有參考迪士尼樂園內較高級嘅迪士尼酒店。市民當然想知會唔會有港人優惠？佢話：「我哋係香港酒店，點會唔照顧香港人？」又指公園不時有港人優惠，酒店都會配合，而酒店優惠亦會配合港人消費模式，例如會喺本地假期聖誕節推優惠價。酒店都會有總統套房，雖未定價但肯定貴得多，但佢話住客除咗商務，都可能有家庭客，因內地客好捨得使錢。
大堂設有16米高圓柱形水族館，3座大樓共471間客房，以海洋為概念，有17間主題客房，另有礁湖主題嘅泳池同餐廳，而佔地達1,200平方米嘅宴會廳最多可筵開80席，係全港最大無柱式宴會廳。酒店外牆以鋁合金製，可阻隔熱力，節省電力。
佢話酒店舊年參加婚紗展已經好多新人想訂婚宴，「有啲話未睇場都肯落訂」，但佢話要攞到酒店牌，開幕前一個月或兩三周就可接受預訂。海洋公園主席孔令成指新酒店落成標誌海洋公園係一站式娛樂消閒中心，行政總裁李繩宗期望酒店會為人流帶嚟雙位數增長。
李八方