萬眾期待嘅賀歲盃大軍名單，噚日終於公佈！極有可能北上發展嘅卓耀國真係入選咗港足，踢埋呢場波先正式暫別香港；另一邊廂港聯雖然有盧卡斯、查維斯呢啲大勇射手，但好多人支持嘅「神鋒組合」基奧同禾達就好正路咁落選。
狗年賀歲盃會喺大年初四（19日）上演，由於冇球會承辦，足總就自己搞番，請到嘅唯一外隊係尼泊爾武警部隊女子隊，將會同香港女子足球代表隊踢頭場，而尾場就由港足對港聯。今次港足一早表明會用省港盃奪冠班底出戰，而因為缺乏外援守門員，港聯喺呢個位置會用番本地球員。
卓耀國北上前助拳
省港盃初選名單嘅四位門將，今次就平均分配喺兩隊，袁皓俊同陳嘉豪會踢港足，謝家榮同陸平中就代表港聯。講番港足人腳，今次由「輝哥」廖俊輝帶領嘅佢哋，有林衍廷同鄭兆均兩位冇踢省港盃嘅球員，「細佬」梁諾恆亦頂咗「大佬」梁冠聰個位。卓耀國之前講過，即將上大陸簽約，但會返嚟踢賀歲盃，佢果然都喺名單之上！
基奧雲尼轉籍前倒戈
港聯就由郭嘉諾帶領，可以話係盡收港超兵器，除咗和富大埔同東方龍獅太多傷兵而冇人入選外，原本因初五要踢亞冠盃而講過唔派人嘅傑志，最後都有盧卡斯同金東進兩位唔使踢亞冠嘅球員入選。唔少球迷都想睇基奧搭禾達嘅「強大攻力」，可惜兩個都好理所當然地冇入選，令唔少球迷失望，反而另一個「基奧」、就嚟做香港人嘅基奧雲尼就成為富力唯一代表。
港足同港聯都會喺13號開操，15同18號操多兩課之後，19號就會喺旺角大球場獻技。球迷覺得冇外隊嘅賀歲盃冇乜睇頭，但有機會支持熱血女足喺旺角場對外隊，另外仲有機會睇到一班「第二梯隊」港腳，對住一班港超聯外援，都幾有籃球全明星賽feel。波飛已開賣，正價100蚊，特惠30蚊，雙料娛樂抵唔抵？睇你點睇。