近月流感嚴重，但一針難求，叙福樓集團就早有準備，去年底同基督教聯合那打素社康服務合作，安排護士到分店同辦公室免費替近300名全職員工接種流感疫苗，佔集團總員工人數約一半。董事總經理黃傑龍（Simon）話員工福利唔係只講錢，有時「講針唔講金」更見關懷。
因見流感越趨嚴重，疫苗收費都唔平，Simon話公司大概5年前起推出流感針計劃，費用由集團全數資助，但開頭反應唔理想，不足100人參與，好多員工覺得冇病就唔使打針，後來員工漸漸關顧健康，終於明白目的係為佢哋好。而員工直系親屬中嘅12歲以下小童或65歲以上長者都可以免費注射。一支流感針差唔多300蚊，Simon希望所有全職員工都可以注射，估計每年開支約20萬，佢話值得。