西環揸fit人中聯辦主任王志民上任唔夠半年，作風似乎比起上手張小明低調，但係前排佢一句「中環（港府）西環（中聯辦）行埋一齊幾好」，真係嚇親唔少人。
西環計劃搞開放日
噚日王志民主持中聯辦新春酒會，唔單止繼續話要同港府行埋一齊，仲要同730萬香港同胞行埋，冇問過港人想唔想喎。上年仲係西環揸fit人嘅張小明，喺同一場合曾大鬧港獨，相比起嚟王志民講嘢係冇咁礙耳，至少佢都識話「家和萬事興」，同埋只係大讚港專學院校長陳卓禧等，冇刻意撩交嗌。
佢仲話中聯辦係「門常開、人常在、事常辦」，一啲都唔神秘，佢透露會搞開放日，歡迎大家參觀中聯辦大樓。特區政府都未搞過開放，估唔到「第二支管治隊伍」咁快就「明張目膽」升呢做第一支管治隊伍。