新年過後，政府高層有人事調動，曾經喺曾蔭權任政務司司長年代擔任新聞秘書嘅現任旅遊事務專員朱曼鈴（Cathy），會喺20日即係大年初五出任新聞處處長，而佢嘅職位接任人就係現時嘅新聞處處長黃智祖（Joe），即係兩個人職位會對調，Cathy終於喺煲呔離任後，再次走入管治核心範圍。
黃智祖上任僅年半
呢次調任最令人關注嘅係，阿Joe其實現職時間唔長，2016年中先上任，至今一年半左右就被調職，難怪惹嚟政界議論紛紛，尤其一直盛傳娥特對新聞處表現評價一直麻麻，唔通係趁今次將阿Joe DQ，趁機整頓新聞處？但講番句公道說話，如果真係要計近年「最短命」處長，應該係邱騰華而唔係佢。
至於1988年已經加入政務職系嘅Cathy呢，曾經喺不同決策局同部門服務，冇做煲呔新聞秘書後，官運一直亨通，先後喺環境運輸及工務局及民政事務局出任副秘書長，喺民政局時更主理西九管理局。2012年7月至2014年11月出任過駐京辦主任，其後擔任旅遊事務專員。今次喺律政司司長鄭若驊僭建醜聞中進入添馬核心範圍，唔知有乜計仔幫娥班子拆彈翻身？
李八方