位於銅鑼灣禮頓道嘅英文報章《南華早報》辦公室，今個月起遷入時代廣場其中6層，新office設計現代化，為迎合數碼大時代，牆上佈滿140個大電視螢幕，《南早》嘅招牌logo亦重新設計，變成一個四方形切開兩邊，一邊黃一邊藍，唔好誤會係黃絲藍絲嘅走中間路線老套嘢，其實意念係來自航海旗號Kilo，代表「我想與你通訊」。
設計新辦公室嘅國際設計公司，曾經同Google、彭博、路透社等傳媒合作。為咗仿效外國傳媒機構，部份員工日後唔會再有固定工作枱，而係自由浮動，人人一部手提電腦周圍走，員工仲可以去打機同做瑜伽；最令員工興奮嘅係，聽聞逢周五有免費啤酒供應，酒名好似叫做「SCMP」。