一位二十幾歲女士在澳洲讀完大學，得護士資格，在雪梨私家診所做護士，去年年尾回港查詢如何在本港執業，本以為考資格試及格就掂，明知及格率甚低，都想一試。點知一問之下，大吃一驚，有關當局話佢嘅澳洲大學護理課程，與香港要求相比，差一大截，要補課聽lecture二百小時先至有資格報考資格試，或去理大或中大讀多一個護理碩士學位，咁就可以免試獲得認可。呢位年輕女子聽到幾乎想喊，原來香港要求幾乎係世界第一，高出澳洲幾皮噃。
香港護理水準的確唔錯，但是否高出澳洲幾班，要有澳洲入醫院經驗嘅人士先至可以比較，如果真係咁高，香港人一則有福，二則要捱。捱乜？病咗入院冇人理，或者搵唔到醫院有病床，要死唔好病，因為醫院病床封塵，唔夠醫護人員開工也。
其實醫護界駛乜咁驚外國畢業生回流？1997之前，英聯邦大學畢業之醫生護士可以回港執業，嗰陣時大家見本地畢業醫生冇工做，冇人工加，搵唔到銀紙咩？咪一樣咁好收入，係香港高級中產！今天醫護人員空前短缺，即使香港效法新加坡打開門畀外國醫護人員進入，唔通香港醫生護士會立即失業或減薪咩，只係有番所謂work-life balance啫，唔駛做到7-11咁殘吖。
我地人微言輕，講完政府會當冇到，睬我地蟻民都儍，但林鄭特首之競選顧問之一林奮強老早要求放寬醫護人員限制，佢嘅黃金五十在六年前已發表報告，林鄭願唔願意聽呀？政界造王者董建華一早支持林鄭競選特首，並且背後出力為林鄭拉票以及安排助選團，佢創辦嘅團結香港基金亦不時發表報告講香港醫生嚴重短缺，呼籲解決醫生荒，林鄭又肯唔肯聽吓老人家講呢？根據黃元山曾聖宇搵到嘅數字，香港人口自2001年起增加8.6%，但醫管局病床同期減少4.6%，呢17年來香港人口迅速老化，公立醫院病床反而減少，醫生排外情況嚴重（以公立醫院外來醫生比例計，只得0.2%，新加坡有27%，英國35%），即使沒有特殊情況（如目前之乙型流感），香港公立醫院出現醫療傳染嘅機率大增（因醫院爆滿人員不足），呢個問題並非臨時增加撥款五億元可以解決嘅。