人氣動畫《妖怪手錶》近年深受小朋友歡迎，連帶多首主題曲都唱到街知巷聞，由五人小朋友組合Dream5唱出嘅《妖怪體操第一》更曾掀起一片熱潮，仲殺入2014年底嘅《紅白歌唱大賽》，之後嘅單曲《Dan Dan Dubi·Zuba》、《妖怪體操第二》同樣取得唔錯成績。
四女一男嘅Dream5係參加2009年選秀節目得以成軍，由重本小鳥、日比美思、大原優乃、玉川桃奈及唯一男隊員高野洸組成，當時年紀最細嘅大原優乃仲係小學生，不過當Dream5靠《妖怪手錶》上位後，玉川桃奈於前年決定畢業兼引退，剩下四位成員都於同年宣佈各自發展，令呢隊深受細路支持嘅組合散band收場。
Dream5嘅前成員大原優乃目前18歲，最近佢宣佈3月初推出首本寫真集，穿上性感泳裝盡晒F Cup巨乳，成功登上Amazon預售榜冠軍，更被睇好成2018年水着界新女神。大原優乃亮相前晚播出嘅節目《有吉反省會》，談到轉型行性感，佢於節目上表示因自己上圍太豐滿，令到一班小fans十分困惑，仲趁呢次機會作出反省。
至於Dream5男將高野洸都淪為「脫星」，20歲嘅高野洸目前專注演戲，仲越來越高大靚仔，下月底亦會有處男寫真集上架，高野洸都曾於鏡頭前剝衫晒結實嘅小鮮肉身形。