樹仁大學新聞與傳播學系系主任梁天偉教授同副教授黃仲鳴博士，獲得大學教育資助委員會研究資助局資助，合力開展香港報人口述歷史研究計劃，訪問咗28位資深報人，包括星島集團前主席胡仙（圖）及《信報》創辦人林行止太太駱友梅等，出版《數風流人物──香港報人口述歷史》，為香港報業史補白。
《星島》由胡仙父親胡文虎喺1938年創辦，胡仙喺訪問中憶述香港淪陷期間，《星島》雖然仲有出版，但受日軍控制，要改稱《香島日報》先可以稍微自由發揮。喺香港聖保祿讀書嘅佢未畢業就入報館，1954年父親病逝後接掌星島報業。胡仙話《星島》一直用中華民國年號，中華民國同公元並用，但前新華社社長許家屯1994年要統戰佢，加上1997年主權移交在即，覺得傳媒要繼續生存就要面對現實，所以喺當年轉為公元紀年。
至於1998年「胡仙案」內幕，訪問中冇提到，但胡仙坦言理財不善被迫出售《星島》股份，「當時《星島》正在賺錢，我希望債權人何伯（何英傑）能給點時間讓我還錢，但他不肯，他一直都想將《星島》送給長孫何柱國。那時我們周轉不靈，又遇上股市下跌，《星島》最終轉手何伯」。