何君堯曾經應電視台邀請同周庭去旅行，可能因此令佢對周庭念念不忘。佢周六晚喺facebook直播時借高鐵通車在即，叫被DQ冇得參加補選嘅周庭多啲到內地認識祖國，話如果行為真誠唔搞港獨，人哋聽其言觀其行，兩年後或者可入閘喎。
繼而佢意有所指：「點解自己困住自己？淨係識睇日文，從日本人嘅角度了解件事，太狹隘咯。」又評頭品足話周庭個樣「仲係BB女、即係後生女一個」，稱睇女仔對手靚唔靚會有啟示，覺得周庭對手「唔係十分多福氣嗰種手，比較勞碌啲，未必一定唔好，希望佢從好方面鍛煉，行正路鍛煉」。
唔只對周庭玉手有興趣，何君堯仲推薦資深大律師胡漢清接任律政司司長，話雖然「佢個底花晒」，一如「磨砂玻璃」，但指對方係有能力有吉士嘅人，忠誠熱誠，可以幫到香港喎。