曾幾何時，「巴基之星」被譽為絕世好馬，後來因連串罷跑而變成性格巨星，暫時坐緊馬監唔跑得住。
不過，「巴基之星」輸在起跑線、贏在終點線的絕技卻後繼有馬，須知來自蔡約翰馬房的「平海福星」繼上仗開齋後，今午（4日）在沙田第七場二班1400米，再在雷神莫雷拉胯下展示超強追勁，連捷於同程，開出1.75倍全熱Win，組合獨贏A1派14元。
4歲馬「平海福星」上賽起步脫腳，末段從包尾位置追上，逢馬過馬，以半個馬位之先大熱贏三班1400米開齋。今次跑高一班，亦是1400米，從第2檔起步，早段照樣留守後叠位置，困足大半條直路，以為會塞死之際，臨尾雷神從極窄的空間中偷位而上，瞬間反敗為勝，將所有對手超越贏一個馬頭位。
「平海福星」至今在港5戰得2冠2亞佳績，4歲馬不知會否報爭1800米香港經典盃（四歲馬系列次關田草1800米，2月18日年初三舉行）。
第七場開出熱頭冷腳，第二名由冷馬「真先生」取得，此駒在見習騎師潘明輝胯下直路最先透出，一度拋離主馬群兩三個馬位，最終都係頂唔住「平海福星」只得第二，賀賢馬房亦因此仲未打破頭馬荒，被迫繼續留守榜尾。
今場三、四名分別為「勇霸神駒」及「世澤之星」，四重彩派7,816元。