隔牆有耳:焗蛋糕 整奶黃包 勁有滿足感 挑機Chef Le Mon 劉鳴煒最愛煮飯仔 - 李八方

隔牆有耳:
焗蛋糕 整奶黃包 勁有滿足感 
挑機Chef Le Mon 劉鳴煒最愛煮飯仔 - 李八方

演藝界有位揸鑊鏟時chok出「鋒」味嘅Chef Le Mon,政壇其實都唔輸蝕,同樣有位package男神喺魔力廚房大演煮嘢戲法。青年事務委員會主席劉鳴煒喺馬會出版嘅最新一期《駿步人生》自爆係煮食男,化身Chef Package,連奶黃包嘅奶黃都會親手炮製,唔知佢同Chef Le Mon幾時嚟個crossover?
2015年起獲梁班子委任為青年事務委員會主席嘅劉鳴煒,喺訪問中大談對青年嘅睇法,佢話社會最應重視嘅唔係最頂尖或最底層嘅10%人,而係中間80%嘅年輕人,而社會選擇太多,亦令青年人更易出錯,因為以前中學畢業入唔到大學,眼前得一、兩條路揀,但𠵱家中學畢業後升學,隨時複雜過地鐵路線圖,揀錯機會好大。
有人或者覺得劉鳴煒係富二代,一早贏在起跑線,但佢似乎唔係咁睇,「我不相信家境好等同人生勝利、學業勝利,我識好多跟我類似背景的朋友,大學都未畢業,或只是勉強畢業,人生中沒甚麼他們認為或別人認同的成就」,強調最重要都係有冇付出過。

網上平台「粗口吸納最多」

八方相信,佢喺廚藝方面一定有付出,否則package男神點會連奶黃都識得整?佢喺訪問中自爆好like入廚,九成半煮西餐,包括焗蛋糕、pancake同pizza,同時會自製點心、叉燒甚至奶黃包,就連奶黃都係自己煮,「都是網上看食譜自學,只要按步驟做,基本上都ok」。廚房有乜魔力令佢咁投入?「烹飪有一種文字工作達不到的滿足感」。
網上平台亦係佢愛流連之地,佢𠵱家有4個網上平台,團隊年齡中位數係26歲,主力為佢打理網頁,「除了『不違法』及『沒錯字』兩個原則,基本上是冇王管」。識睇雖然要睇留言,但佢都直言「留言質素普遍不高」,反而「粗口吸納得最多」,但因滲透力強,故此遇到值得大眾討論嘅課題都會喺平台發放,但唔會因此脫離面對面嘅交流。

李八方