昨日因應立春，寫狗年大勢，今日再講普通話必修之事。
香港8間教資會資助大學（統稱公立大學）之大學生畢業率非常高，入讀大學四年而考試肥佬，畢唔到業嘅，少之又少，大概不到1%，香港大學生畢業率之高，如爭取全球第一，應該係熱門！香港大學生畢業率高，最主要係因為入學難，入得到大學嘅，唔係精英尖子就係半精英，加上大學評分有一套規矩，大家識玩遊戲就得啦，「肥佬」乃自取其咎。報紙報導，浸大學生考「普通話豁免試」嘅，大部份不及格，要必修普通話三學分，呢樣幾合乎預期，因為如果個個及格，語文中心之普通話老師就會無事可做，要炒魷嘅啦。但一旦上堂讀普通話，咁又唔同，老師邊會故意留難吖，故此考試及格率一定近乎百分百，以免阻止學生畢業。睇浸大報告，不能畢業之學生比率，極低極低，大家就明白啦！浸大普通話豁免試的目的係逼學生修讀普通話，而唔係令佢地畢唔到業。如果我左丁山今日係浸大生，都費事去申請豁免，一年級一定立即去讀普通話，三個學分「依絲執」。
今時今日，普通話講得唔好，在ibank想搵份高薪職位係好難嘅，求職之事，英文好係必需條件，中文好（包括能講流利普通話）係充份條件，凡大學生都要讀好、學好普通話。但今天嘅幼稚園，已用普通話及英語教學，沙田陳太嘅孫女讀K2，講普通話發音仲叻過左丁山，故此十幾二十年後，浸大要學生必修普通話，恐怕係多此一舉咯。講起嚟，到中學先要學普通話，廣東人要有啲天份。左丁山在中學三年級已知國語重要，走去中國學生周報（當時係陳特社長，編輯陸離）報讀初級國語班，老師係梁雅玲女士，一位好老師也，仲帶埋學生去調景嶺參加研習營，點知左丁山總係講唔掂，全班最差，自知水皮，唯有中途輟學。入到新亞，所有講師都係講國語，最初三個月聽到一嚿雲，唔知張丕介、唐君毅、鄭東榮諸位先生講乜（分別係山東、四川、台灣口音），後來有機會聽新雅中國語文研習所所長劉銘先生演講，方知正宗國語原來係咁易聽，發音可以咁清晰嘅，劉先生講嘅係正宗京片子喎（有別於今天北京人之口音），於是有立即跟隨劉先生學國語之衝動，但原來佢在新亞係專教外國人學生嘅（如外國領事館人員），之後左丁山掛住搞學生會，冇晒時間去再讀國語班，今天真係有啲後悔也！