今年係狗年，唔少商場都有狗仔睇門口，當然唔係惡犬，而係得意puppy等大家影相呃like。好似海港城海運大廈正門嘅樓梯，除咗化身成七彩繽紛嘅巨型糖果屋，兩邊仲有8隻立體賀年狗狗，佢哋身上印有唔同圖案，寓意賀年語句，例如富貴竹代表事業蒸蒸日上同大富大貴，平安結就寓意身體健康同平平安安等。大樓梯前仲有一隻全場最大、高逾6米、身上印有代表幸福好運四葉草圖案嘅超巨型立體賀年狗，駐守門口同大家拜早年。
海港城今年仲請咗玄學風水師李丞責推出慈善新春開運卡，教大家喺家庭、健康、財富、事業、學業、愛情等9大範疇開運，只要投入1蚊硬幣就可以抽開運卡一張，掃描二維碼獲取李師傅嘅新春開運短片，了解狗年運勢同增運大法。活動收益會全數撥捐香港血癌基金。