上個星期，灣仔炸彈湧現，同添馬艦嘅政治炸彈一樣咁嚇人，但政務司司長張建宗就冇被嚇親，噚日喺題為〈安全城市的無名英雄〉嘅網誌中，借警隊兩度拆彈向佢哋大派like。
張建宗話喎，香港警務處爆炸品處理課上周連續出動兩次，史無前例5日內拆咗兩個灣仔沙中綫地盤嘅炮彈，而佢上周五就到訪爆炸品處理課親自感謝拆彈前線人員，繼而入正題大讚警隊專業同卓越，仲拋出數字佐證，話香港去年整體罪案數字為5.6萬宗，較2016年跌7.6%，係1975年以來最低，行劫罪案亦由1997年嘅2,993宗跌至2017年嘅163宗，即係由平均每日超過8宗，跌至平均每兩日少於1宗。
小肥張強調安全城市美譽得來不易，要歸功3萬名警員努力，指每位紀律部隊成員都係安全城市嘅無名英雄，值得讚賞。