告東尼馬房有性格巨星之稱的「巴基之星」已被禁賽大半年，最近兩次喺1800米由一位外籍騎馬人策騎彈草閘，過程非常順利，冇再喺1600米分支路口拒絕展步，而呢兩次彈閘都及格，禁賽令能唔能夠解除，下星期二（6日）可以講得上係關鍵。
據了解，「巴基之星」將會參加當日朝早田草1600米試閘，如果佢生生性性再及格，只要再試多一課草地1600米大閘，並取得及格，就好有機會獲准復出上陣。
大家最關心邊個會騎「巴基之星」參加未來兩次咁關鍵嘅試閘，會唔會係曾連續兩次「巴基之星」在自己胯下立地成佛嘅莫雷拉呢？
《蘋果》記者問過雷神，佢話仍未落實，但機會頗高。「巴基之星」上季尾精英碟同今季季初試閘，先後兩度喺雷神胯下拒絕展步。究竟今次結局又會係點，大家拭目以待。