上周六澳職聯賽，次席嘅紐卡素噴射機重上勝軌，喺主場以2:0擊敗墨爾本勝利，結束兩場不勝頹勢之餘，更可喜可賀嘅係休戰多時嘅前鋒奧當路雲終於復出。今季加盟，已經為噴射機入咗七球嘅奧當路雲，喺上年12月初傷癒復出即刻再傷，休戰近兩個月之後，終於喺今場波復出仲正選上陣。奧當路雲今場波冇進賬，由守將保加特喺31分鐘先開紀錄，前者喺65分鐘退下火線，五分鐘後噴射機再入一球，正係由入替佢嘅萊利麥基建功射成2:0。
噴射機全取三分，喺積分榜次席位置更穩固，入季後賽機會亦更大。有人歡喜有人愁，噴射機贏波兼有猛將復出，輸波嘅勝利今場有門將羅倫斯湯馬士頸部受傷被調離場，條頸受傷可大可小，隨即被送入醫院治理。
另一場阿德萊德聯（右下圖紅衫）主場迎戰珀斯光輝，主隊喺開賽四分鐘就先失守下，連入兩球以2:1反勝。