一月尾轉會窗關閉前，阿仙奴、車路士同德甲嘅多蒙特先後達成交易協議，嚟個前鋒大執位，兵工廠以5,600萬鎊向多蒙特收購奧巴美揚，多蒙特就向車仔借用巴舒亞伊，之後車仔就由阿仙奴買基奧特。車仔領隊干地當巴舒亞伊係廢物，但佢嚟到多蒙特即刻顯身價，上周五德甲多蒙特作客科隆，「阿姨」踢足全場貢獻兩入球加一次助攻，幫蜜蜂兵團以3:2取勝，2018年聯賽首捷。
幫多蒙特18年開運
由車路士過檔多蒙特只係兩日，巴舒亞伊就即刻喺上周五場德甲正選上陣，仲喺35分鐘先開紀錄，接應隊友謝利美杜利安左路傳中，門前六碼企靚位無人看管下射入。易邊後主隊科隆喺60分鐘扳平，前鋒西蒙祖拿補頂得手。
之後戰情精采，巴舒亞伊喺兩分鐘後又發威，今次到美國中場基斯甸普列錫做助攻，直線傳畀阿姨，造就佢快腳射入。科隆到69分鐘又扳平，守將佐基美利接應角球頂入成2:2平手。到比賽尾段，多蒙特再入一球奠勝，今次阿姨唔入波但做咗助攻手，喺一次快攻交波畀另一位車路士棄將舒賀爾尼，後者禁區頂射門得手，為多蒙特奠勝3:2勝局。
入球效率勁過卡尼
原本巴舒亞伊喺今場有機會大演帽子戲法，不過完半場前嘅入波，球證經過VAR之後裁定越位在先；不過可以喺德甲地標戰就梅開二度，上一次已經係2013年嘅奧巴美揚；而佢喺今場波先開紀錄嘅一球，亦都係今季德甲累積第500球。呢位比利時前鋒首戰大爆發，某程度上都係摑車仔領隊干地兩巴掌，佢自從喺上季加盟以嚟，一直冇俾干地重用，事實上，由16/17球季開始，計算所有至少入到五球嘅球員，巴舒亞伊係效率最高嘅一位，平均每85分鐘就入一球，勁過第二位，90分鐘入一球嘅哈利卡尼。
巴舒亞伊被借走，干地一心諗住有嚟自阿仙奴嘅基奧特頂上，不過干帥喺上周五記者會話，呢位法國新兵加上艾華路莫拉達都仍然有傷在身，喺周一作客屈福特場波有機會一齊缺陣，隨時又要打無鋒陣。