【最港電影大獎 黃百鳴系列之9 番外篇】
不講不知原來黃百鳴今年已經71歲，腰板挺直中氣十足，時下不少後生都被比下去，他分享喼弗心得，心境決定一切「覺得自己後生，你就會後生㗎喇！」黃百鳴的起心肝健身，全因電影《最強囍事》逼出來，令他由一身腩肉，搖身變成筋肉人，亦證明世上沒有醜男人，只有懶的男人。
黃百鳴論盡影圈黃金十年見聞，早前他在遊艇上接受訪問，展示一身肌肉，講到養生只是近年的事。他笑言：「你成日覺得自己後生，你就會後生，你要keep住咁嘅身體，你一定唔好亂咁食嘢，尤其唔可以食消夜，永遠食飯就七分飽囉。」佢反而話運動唔算做得好多，因為一星期返足五日工，只有星期六、日可以去做吓健身、跑步，用嚟收吓肚。」正如早年吳君如減肥時所講「世上冇唔靚嘅女人，只有懶嘅女人」一樣，黃百鳴覺得有決心已經成功一半：「我覺得人冇話做唔到，只要畀自己set一個目標就得。」
得三日訓練
講到臨老才健身，黃百鳴的故事要追溯到11年拍的賀歲片《最強囍事》，戲中他演內地石油大亨，要追內地演員閻妮。為贏得美人歸，黃百鳴要由原本肥頭耷耳大肚腩，搖身變成六嚿腹肌筋肉人，他說：「嗰時啲工作人員問我『老闆，你係咪想做電腦特技？』我話唔使，你畀兩、三個禮拜我，我前面要食肥啲。總之有兩、三個禮拜時間畀我，就會操弗。」
豈料原本的兩、三星期時間，變成只有三日給黃百鳴收身，原因係所有演員撞期，三日後就要拍泳池戲：「但原來呢個世界啲嘢真係逼出嚟，嗰三日我就地獄式訓練自己。嗰日我一除衫一行出嚟，係成個crew拍手掌，套戲有得睇我冇得呃你。」
「我係唔衰得」
自此黃百鳴便保持此狀態，他不諱言靠機器收肚腩：「咁我係會做機去收個肚，手臂、個胸可以做健身。」是次訪問，他亦視為《最強囍事》後另一挑戰：「你知我平時都唔願做訪問，但後來我應承，係畀自己一個挑戰，因為我接受呢個訪問，就可以操弗我自己，我係唔衰得，希望咁嘅狀態，唔會令你哋失望啦！」
採訪：陳月媚
攝影：陳俊強
由《蘋果動新聞》和娛樂版舉辦的「最港電影大獎」現正接受讀者投票，選出心目中的最「港」之選，包括最港電影、最港男、女演員等，截止日期為2月21日。賽果將於《蘋果動新聞》和娛樂版揭曉。「最港電影大獎」投票網址
http://bit.ly/thekongestfilmawards