24歲年輕騎師祈普敦曾被盃王大摩視為馬房一分子，兩人有過良好合作關係，咁今戰(4日)沙田日賽，大摩屯重兵全日豪出12駒之多，祈普敦分到幾多隻呢？答案竟然是一隻都冇！
祈普敦不但今季未贏過摩廐馬，今次連騎都冇得騎摩廐馬，似遭大摩打入冷宮，其實敦敦今期的確景況淒涼，其他練馬師亦冷落他，全日竟然只得一匹座騎，就是第四場四班1400米蘇保羅馬房的「智愛」，相信敦敦心裏一定幾難受。
好在「智愛」並非死馬，季內4戰得1冠1季，4歲質新分子仍在進步中，埋門祈普敦一手親操，人馬又試大閘力谷狀態，該課閘跑第二，力追高達107分的「一哥」，可見「智愛」狀態甚勇，機會不能低估。
另一方面，除了祈普敦，蔡明紹全日亦只得一匹座騎，乃第一場五班草地1200米的「好富有」，俱是全日最少馬跑的騎師。蔡明紹頭場1時正跑完「好富有」，便可收工整個下午享受禮拜日假期了。