影后惠英紅今日58歲生日，她所屬的英皇公司昨晚於灣仔為她舉行生日會，湯怡、麥子樂與溫碧霞等到賀。惠英紅笑問大家自己似不似58歲？她說：「越嚟越驚呀，因為仲有兩年就登六，今年嘅生日願望係希望年底接到一個好勁嘅劇本，𠵱家已經傾緊，希望接得成啦，係香港電影，出年睇吓乜嘢情況。」
問惠英紅希望今年再於金像獎爭獎嗎？她說：「今年應該唔會嘞，因為今年有啲係台灣片，有啲動作片，應該要睇2019年。今年最想就係拍拖，所以要沾吓阿嬌嘅旺氣，希望佢可以過啲旺氣畀我，自己都好耐冇拍拖。」問惠英紅是否要求太高？她說：「唔係，要搵一啲年紀大少少又冇拍拖嘅好難搵，細過我就唔係咁好。異地戀都得㗎，我呢啲年紀唔使成日黐住嘅，所以頭先特登喺老闆（楊受成）面前同阿嬌講，睇吓佢有冇介紹畀我。」
採訪：曹家誠、王連連
攝影：沈健程