周日(4日)田草十場賽事用C跑道作賽，天文台預測天氣乾躁，估計場地掛牌仍為好地。
睇番最近1月7日同一移欄六場轉彎路程賽事，除了「紅衣優駿」擺前走贏馬外，其餘頭馬全由後上馬包辦，如「蒜頭爺爺」、「閃耀駿駒」及「志趣相投」都係入直路從尾叠憑後勁反先對手勝出，故此靠追食糊嘅馬，不妨優先留意。
今戰第七場二班1400米，「平海福星」上仗正是於1月7日田草C欄1400米勝出，當日「平海福星」起步脫腳，零零仃仃於外欄包尾，一直尾隨群駒，直路初仍在外叠尾列，其後好似裝咗摩打咁，最終輕鬆超越對手，猶如當初「巴基之星」的「輸在起跑線、贏在終點線」跑法。「平海福星」贏完等番同一移欄才再跑，睇部署有心添食。
另外，第十場三班1400米的「健康歡笑」，歷來兩捷皆在田C欄1400米所得，今仗重返強項兼改配潘頓，有機會重開勝門。