農曆年初三赤口不宜拜年，好多人習慣到沙田車公廟求籤祈福。旅發局就搵嚟兩個海外小朋友，向車公越洋視像求籤，乘機向旅客介紹本港農曆新年文化，順便教教大家參拜車公嘅步驟。兩位小朋友最後都求到中籤，其實中籤都唔錯。
兩位小朋友係分別來自日本嘅白井紡生同澳洲嘅Lucas，佢哋隔住個mon求籤後，就由有23年解籤經驗嘅汪道靈居士即席為佢哋解籤。9歲嘅白井紡生抽到中籤，想知自己做唔做到野生動物攝影師，汪居士解籤後就話有啲困難同辛苦；8歲嘅Lucas就話想上月球，同樣抽到中籤，汪居士指佢16歲後有機會上月球呀！