八方自問都係「吹」得之人，不過同幾位英皇仔相比，甘拜下風。該校口琴校隊去年10月，喺德國第八屆世界口琴節橫掃少年組冠亞季軍凱旋而歸，4主將大年初四會公開表演。咁「吹」得當然有代價，英皇口琴隊隊長葉進禧同八方講，隊員苦練備賽，有人練到嘴唇腫脹流血，變「豬嘴」，需知世界口琴節4年一度，被形容係口琴界奧運，高手如雲，而英皇校隊一行三十幾人，過程難免甩漏，好彩有驚無險，橫掃少年組冠亞季軍！
初四圓方表演
4名隊員會喺年初四圓方表演《新春樂》、《恭喜恭喜》等，仲有《Balkan medlay》和《Tico Tico》經典西方音樂，當日下午3點起表演兩場，充滿新年氣氛。